పుంస్త్రీలింగం
నీరు న్యూట్రల్ కాదు
అది యెట్లన్నన్ ...
లంకల్లోంచి తొంగి చూస్తే
నది ( ఇదొక పేరైనా అదీ నీరే )
తొడల్ని ఎడం చేసుకుని
నగ్నంగా పడుకున్న
ఆడదిలా వుంటుంది
తెడ్ల చేతులూపుకుంటూ
ఒడ్డు వక్షం వేపుకి పాకుతుంది
పాపాయి లాంటి పడవ
గాలి చేతుల్తో వీపున్నిమురుతూ
ఒడిలోకే లాక్కుంటుంది యేరు
కృష్ణపక్షంలో ఎండిపోయే
ఆకాశప్పాడి గేదె
చివరిగా యిచ్చిన కాసిని పాలూ
నీటిమీదా, నింగి మీదా
చుక్కలు చుక్కలుగా ఎండిపోతాయి
నిన్న మొన్నటి దాకా యేరు
ఒదిగి ఒదిగి వెళ్తున్దేదా
ఇపుడేమో గట్లెక్కుతుంది
మేడలూ మెట్లేక్కుతుంది
నేల నరాల్లోంచి పాకి
వీధి మొగల్లో
ఇళ్ళ పంచల్లో
మేడల్లో , మిద్దెల్లో
శివ లింగాలై మొలిచి
వెల్లకిలా పడుకున్న బిందేల్నీ
దోసిళ్ళ దోనెల్నీ
అర చేతుల దొప్పల్నీ
అభిముఖంగా ఆకర్షించుకుంటుంది
నిజంగా నీరు
రెండు వైపులా
పదునుగల కత్తి
అది
ఆడదీ
మగాడూనూ....
No comments:
Post a Comment