పికాసో ప్రేయసులు - 4
డోరా మార్
భూమి సూర్యుని చుట్టూ పరిభ్రమిస్తూనే ఉంది.
గోడ మీది కేలండర్లు మారిపోతున్నాయి.
1936 వ సంవత్సరం వచ్చేసింది.
ఒక భారీ స్థాయి విందు కార్యక్రమం .
ప్రఖ్యాత కవి పాల్ ఎల్వార్ ఆ రోజు పాబ్లో పికాసో తో కలిసి ఆ విందులో పాల్గొన్నాడు.
ఫోటోగ్రాఫర్ గా మంచి పేరు ప్రఖ్యాతులు సంపాదించిన ఫ్రెంచి యువతి డోరా మార్ కూడా అక్కడ ఉంది.
డోరా మార్ అపురూపమైన అందాల రాశి. ఆమె మాట తీరు గమనించిన వాళ్ళు ఆమెతో పాటు ఫ్రెంచి భాషను
కూడా ప్రేమిస్తారు. అంత చక్కని ఫ్రెంచి మాటలాడ గలిగిన వాళ్ళు అతి అరుదుగా కాని కనిపించరు. కనిపించరు.
ఆ రోజు పాల్ ఎల్వార్ ఆమెను పికాసోకు పరిచయం చేశాడు.
ఆమె భాష పికాసోని కట్టి పడేసింది. ఆనతి కాలంలోనే ఆ పరిచయం ప్రేమగా పరిణమించింది. ఈ ప్రేమ సంబంధం
ఏర్పడిన తరువాతే పికాసో ప్రపంచాన్ని ప్రభావితం చేసిన కళాఖండం ' గెర్నికా ' చిత్రించటం ప్రారంభించాడు.
స్పానిష్ అంతర్ యుద్ధ బీభత్సాన్ని చిత్రించిన ఆ కళాఖండం చూస్తే ఎవరికయినా సరే వొళ్ళు గగుర్పాటుకు గురి
అవుతుంది. కానీ, అంతటి బీభత్సాన్ని ప్రతిబింబించే ఆ పెయింటింగ్ లో కూడా ఒక అందమయిన అమ్మాయి
ముఖం కనిపిస్తుంది. అది డోరా మార్ ముఖం. అందులో ఆమె ఏడుస్తూ ఉంటుంది. మంచి ఫోటోగ్రాఫర్ కాబట్టి డోరా
మార్ ఆ పెయింటింగ్ కి అవసరమయిన మౌలికమయిన సామాగ్రిని సమకూర్చటంలో ఏంటో సహకరించింది.
ఉన్నట్టుండి ఒక రోజు మేరీ వాల్టర్ అకస్మాత్తుగా పికాసో స్టూడియోకి వచ్చింది. అక్కడ ఆమె డోరా మార్ ను
చూసింది. పికాసోకీ , ఆమెకీ మధ్య కొనసాగుతూన్న ప్రేమ కలాపాల గురించి ఆమె అప్పటికే రకరకాలుగా
వినివున్నది.
మేరీ వాల్టర్, డోరా మార్ ల మధ్య మాటా మాటా పెరిగింది.
మీరిద్దరూ మాట్లాడుకుని నేను ఎవరితో ఉండాలో తెల్చుకొమ్మని ప్రేయసుల కిద్దరికీ చెప్పేసి చిద్విలాసంగా నిమ్మకు
నీరెత్తినట్టు కుర్చీ లో కూర్చుండిపోయాడు పాబ్లో పికాసో.
ప్రేయసులిద్దరి మధ్యా ప్రారంభమయిన మాటల యుద్ధం ముష్టియుద్ధంగా మారిపోయింది. జుట్టూ జుట్టూ
పట్టుకున్నారు. ఒంటిమీది గుడ్డల్ని చించుకున్నారు. పరస్పరం ఒకరిని ఎత్తి కుదేసుకున్నారు.
పికాసోతో ప్రేమలో ఓడిపోయినట్లు భావించింది మేరీ వాల్టర్. అవమానించ బడినట్లు భావించింది. పికాసో జీవితం నుంచి బయటికి వెళ్ళింది.
డోరా మార్ విజేత అయిన ప్రియురాలుగా పికాసోతో ఉండిపోయింది.
' నేను ఎవరితో ఉండాలీ అనే అంశాన్ని తేల్చటం కోసం ఇద్దరు ఆడవాళ్ళు కొట్టుకోవటం నా జీవితంలో అత్యంత
మధురమయిన సందర్భం' అని పికాసో స్వయంగా చెప్పుకున్నాడు. ఒక ఆడది తన మీద వున్న హక్కు గురించి
మరో ఆడదాన్ని ఆడిపోసుకున్న సందర్భాలను చాలా ఇష్టపడేవాడు.
మేరీ వాల్టర్ వెళ్ళిపోయిన ఏడు సంవత్సరాల తరువాత డోరా మార్ నుంచి కూడా పికాసో దూరమయ్యాడు.
ఈ ఎడబాటు డోరాను నిలువునా కుంగదీసింది. ఎడతెగని ఏడుపు. చివరికి ఏడుపు ఆగటం కోసం ఆమె వైద్యం
చేయించుకోవలసి వచ్చింది.
జీవితాంతం ఆమె ఆ షాక్ నుంచి తేరుకోలేక పోయింది. దాదాపు ఇరవై సంవత్సరాలు ఇదే విషాదం ఆమెను
వెంటాడింది. ఆమె జీవితంలోకి మరికొందరు మగవాళ్ళు అడుగు పెట్టినప్పటికీ ఆమె మాత్రం పికాసోని
మరచిపోలేకపోయింది. పికాసో నిరంతరం ఆమెను కన్నీరు కార్చే సౌందర్యవతి గా మాత్రమే చిత్రిస్తూ వచ్చాడు.
కళాఖండాలుగా పికాసో తనను చిత్రిస్తున్నందుకు డోరా మార్ ఆనందంతో ఉప్పొంగిపోతూ ఉండేది. పికాసో తన వర్తమానాన్ని కాదు తన
భవిష్యత్తును కళాఖండాలుగా చిత్రిస్తున్నాడనే వాస్తవాన్ని ఆమె గుర్తించలేక పోయింది. ప్రేమలో మోసపోయి,
పిచ్చిదయిపోయి, నాశనమయిపోయిన అందాల రాశిగా పికాసో ఆమెను చిత్రించాడు. ప్రత్యేకంగా డోరా కోసం కొన్ని
పెయింటింగ్స్ వేశాడు పికాసో. 1997 లో తాను చివరి శ్వాస విడిచే వరకూ వాటిని భద్రంగా తన దగ్గరనే చుకుంది
డోరా.
( సశేషం )
